అంత్యక్రియల్లో పోర్న్ వీడియో

అంత్య‌క్రియ‌ల్లో పోర్న్ వీడియో ప్లే అవ్వ‌డంతో అంద‌రూ షాక్‌కు గురైన సంఘ‌ట‌న ఇంగ్లండ్‌లో జ‌రిగింది. ఇంగ్లండ్‌లోని కార్టిఫ్ ప్రాంతంలో జ‌రిగిన
ఓ రోడ్డు ప్రమాదంలో తండ్రీకొడుకులు మృతి చెందారు. వీరికి అంత్య క్రియ‌లు నిర్వ‌హించిన అనంత‌రం వారికి నివాళులర్పిస్తూ నిర్వహించిన కార్యక్రమంలో పొరపాటున నివాళి వీడియోకు బదులు హార్డ్ కోర్ పోర్న్ వీడియో ప్లే అవడంతో అక్కడున్నవారు ఒక్కసారిగా షాక్ తిన్నారు. కార్డిఫ్ ప్రాంతానికి చెందిన సిమన్ లూయిస్(33) కొత్త సంవత్సరం ప్రారంభం రోజున నిండు చూలాలైన భార్య, మూడేళ్ల కుమార్తెతో కలిసి కారులో ప్రయాణిస్తుండగా ప్రమాదం చోటుచేసుకుంది. లూయిస్ అక్కడికక్కడే మృతి చెందాడు. తీవ్రంగా గాయపడిన అతని భార్యకు సిజేరియన్ చేసి కొడుకును బయటకు తీశారు. అయితే కొద్ది గంటల తర్వాత పసికందు మరణించాడు. భార్య మాత్రం ప్ర‌స్తుతం ఆసుప‌త్రిలో చికిత్స పొందుతోంది.

ఈ ఘ‌ట‌న‌తో లూయిస్‌ కుటుంబం తీవ్ర విషాదంలో కూరుకుపోయింది. తండ్రీ కొడుకులు ఇద్దరికీ కలిసి అంత్యక్రియలు నిర్వహించారు. అనంతరం నిర్వహించిన నివాళి కార్యక్రమంలో శ్మశాన నిర్వాహకులు నివాళిగా లూయిస్ వీడియోకు బదులు పోర్న్ వీడియోను ప్రదర్శించారు. దీంతో అక్కడున్న వారు షాక్‌కు గురయ్యారు. దీనిని గమనించిన లూయిస్ మామ వెంటనే నిర్వాహకులకు విషయం చెప్పి ఆపివేయించారు. అప్పటికే అది నాలుగు నిమిషాలు ప్లే అయింది. దీనిపై శ్మ‌శాన నిర్వాహ‌కులు ఆవేద‌న వ్య‌క్తం చేయ‌గా… మతపెద్ద క్షమాపణలు చెప్పారు. తన 30 ఏళ్ల విధి నిర్వహణలో ఇలా ఎప్పుడూ జరగలేదన్నారు. జరిగిన దానికి మనస్పూర్తిగా క్షమాపణలు వేడుకుంటున్నట్టు తెలిపారు. బ్లూ టూత్ ద్వారా కానీ లేదంటే వైఫై ద్వారా కానీ అది బహుశా వచ్చి ఉండవచ్చని ఆయన వివరించారు.